1993- cü il avqustun axırlarında Qubadlı rayonu artıq düşmən əhatəsində idi. Cəbrayılın axırıncı kəndləri: Çullu, Maşanlı və Dağtumasın da düşmən əlinə keçməsi təhlükənin qapı ağzında olduğunu göstərirdi. Düşmən gah Qafan, gah Gorus, gah da Laçın rayonu istiqamətindən hücuma keçirdi. Qarabağın Xocavənd rayonu ərazisindən güclü hücuma keçən düşmən, nəyin bahasına olursa olsun, Qubadlını işğal etmək istəyirdi. Hər dəfə də yerli özünümüdafiə dəstələrinin müqavimətinə rast gələrək, itki verib, geri çəkilirdi. 1993- cü il avqustun 30-da cəmi beş-on nəfər əsgər var idi. Həkəri çayı boyu kəndlərə atılan mərmilərin ardı-arası kəsilmirdi. Günortadan bir az sonra isə yaylım atəşi başlandı. Bu insanların son ümidlərini də qırırdı. Gorusdan hücum edən ermənilər yazı düzündə bizimkilərin müqaviməti ilə qarşılaşsalar da, laçından maneəsiz keçib Muradxanlı kəndinə daxil oldular. Qoşun hissələri Həkəri çayı boyu bütün kəndləri atəşə tutub. Həmin gecə Xanlıq kəndinə qədər olan bütün kəndlər ermənilərin əlinə keçib. 1993-cü il avqustun 31-də hər tərəfli mühasirəyə düşmüş Qubadlının geri çəkilməkdən başqa çarəsi qalmadı. Qubadlı uğrunda döyüşlərdə 54 nəfər şəhid olub. Ümumililikdə isə rayon 230 şəhid verib. Qubadlını itirməklə Azərbaycan iqtisadi, mədəni, tarixi itkilərlə də üz-üzə qalıb. Aşağı Mollu və Həmzəli kəndlərinin hər birində 9, Əliquluuşağı kəndində 5 qədim mağara bu günümüzə qədər gəlib çıxmışdı. «Gavur dərəsi» deyilən ərazidə 4-cü əsrə aid mağara vardı. Əliquluuşağı kəndində 5-ci əsrdə tikilmiş Göy Qala, Muradxanlıda «Qalalı» qalası, Xocamsaxlı kəndindəki qala rayon işğal olunana qədər dururdu. Türbələr, qədim körpülər və çox belə abidələr qubadlının maddi sərvətlərindən idi. Amma indi bu abidələrin taleyi məlum deyil. Qubadlının işğalı nəticəsində həmçinin 445 min kvadrat metr mənzil fondu, 4 tibb ocağı, 6 uşaq bağçası, 61 ümumi təhsil məktəb, 10 mədəniyyət evi, 24 klub, 1 tarix - diyarşünaslıq muzeyi , 60 kitabxananı ermənilər dağıdıb.
Ana səhifə | AzNetin ən yaxşı əyləncə saytı 