1950-ci il iyunun 1-də BMT Baş Assambleyası tərəfindən təşkil olunan "Qadınların Beynəlxalq Konfransı”nda
uşaq hüquqlarının təmin edilməsi ilə bağlı təkliflər səslənib və elə
həmin tədbirdə də 1 iyun tarixini uşaqların beynəlxalq müdafiəsinə həsr
etmək qərara alınıb. Bundan sonra iyunun 1-i Uşaqların Beynəlxalq Müdafiəsi Günü
kimi tarixə düşüb. Dünyanın əksər ölkələrində olduğu kimi, bu gün
Azərbaycanda da qeyd edilir.Bu əlamətdar gün nəinki uşaqların ən çox
sevdiyi gün eyni zamanda böyüklərə də uşaqların daim onların qayğısına
ehtiyacları olduğunu və uşaqlar üçün məsuliyyət daşıdıqlarını
xatırladan bir gündür.
Beynəlxalq uşaq günü dünya ictimaiyyətinin uşaqların müdafiəsi
istiqamətində müharibələrə yox deyərək, uşaqların sağlamlığının
qorunması, onların demokratik ənənələrlə düzgün tərbiyəsi üzrə
mobilizasiya günüdür.
Bütün demokratik dövlətlərdə olduğu kimi, Azərbaycanda da insan
haqlarının qorunmasına xüsusi önəm verilir. Təbii ki, uşaq hüquqları da
insan haqlarının ən mühüm və ayrılmaz hissələrindən biridir. Nəzərə
alsaq ki, uşaqlar bizim gələcəyimizdir və ölkəmizin gələcəyi onların
əlindədir, onların müdafiəsinə hamılıqla qoşulmaq bizim borcumuzdur.
Valideyn himayəsində olan uşaqların müdafiəsi ilk növbədə onların
valideynləri tərəfindən təmin olunur, amma valideyn himayəsindən məhrum
olmuş uşaqların hamımızın qayğısına və diqqətinə ehtiyacları var.
Uşaqların Beynəlxalq Müdafiə Günü
münasibəti ilə Tofiq İsmayılov adına Uşaq-Gənclər Yaradıcılıq Sarayında
bayram tədbiri təşkil edilib.Uşaqların incəsənətin müxtəlif sahələrində
biliklərə yiyələnməsində xüsusi rolu olan Tofiq İsmayılov adına
uşaq-gənclər yaradıcılıq sarayının direktoru Bədayyə Ramazanova
Azərbaycan uşaqlarının zəngin mənəvi dəyərlərə malik olduğunu
vurğulayıb . Bu il Azərbaycanda uşaq ili olduğunu xatırladan Bakı şəhər
Gənclər və İdman baş İdarəsinin rəisi Raqif Abbasov isə bildirib ki,
ölkədə uşaqların təhsili, tərbiyəsi ilə bağlı dövlət səviyyəsində
genişmiqyaslı iş aparılır. Bayram günü sarayın müxtəlif dərnəklərinin
şagirdləri bacarıqlarını nümayiş etdirir.
Beynəlxalq Uşaqlar günü münasibəti ilə balacalarımızı təbrik edirik!