Su quyusunda 148 ilan çıxdı

Türkiyədə Diyarbəkir bölgəsinə bağlı Germik rayonunun Aşağıtaşmalı kəndində yaşayan Bəkir Özkahraman həyətindəki su quyusundan su çıxararkən qəribə hadisə ilə üzləşib.

Bəkir Özkahramanın iplə çəkdiyi vedrədə su əvəzinə bir neçə ilan olub.


İlanları öldürdükdən sonra diqqətlə quyuya baxan Bəkir Özkahraman orada çoxlu sayda ilanın olduğunu görüb və kəndliləri köməyə çağırıb. Kəndlilərin köməyi ilə quyudan 148 ilan çıxarılaraq öldürülüb. İlanların uzunluqları 30 santimetr - 2 metr arasında dəyişib. Öldürülən ilanları yan-yana düzən kəndlilər şəkil də çəkdiriblər.


Bəkir Özkahraman deyib ki, qorxudan quyuya yaxınlaşa və heyvanlarına su verə bilmir. O bildirib ki, keçən il su quyusunun yaxınlığında qızı Gizəmi ilan vurub: "İndi qızımın vəziyyəti yaxşıdır. Ancaq sabah vəziyyət necə olacaq? Səlahiyyətli şəxslərdən xahiş etmişəm ki, su quyusunun ətrafı və evim dərmanlansın”.